ته بلاره که ته دست پینه داشته
 ته دل دور که افتاب کیمه داشته
 
 پیر کور /ی و عشق ته داشته
 تینه غم دچی و عشق ته داشته
 
 تیی که دیم داشتی گل ونوشه
 گیسه داشتی گندم خوشه خوشه

 

 
 پیر تسه قراری جا بساته
 مردم چاربیداری جا بساته
 
 تسه لله زویه لیلی خوندسه
 تسه نجما و کتولی خونسه
 
 لوه زنجیر دار ره تسه بروته
 رمه وره ما ره تسه بروته
 
 داشتی نداشتی عروسی هاکرده
 هرچی داشته ته وسه دی هاکرده
 
 عاروس زن بی ته صحرا دکتی
 خسته تن رمه همراه دکتی
 
 ته چتر بزه زلف ره او بشسه
 چش سرمه ره ورف کو بشسه
 
 مه ره داشتی کشه دوش مشت هیمه
 کتی وای واری بیشه به بیشه
 
 ته شه اتا مزیر مرد مونسی
 صدا ره سر دایی مار مار خونسی
 
 ترسی از وارش و دریو نداشتی
 ترسی از تاریکی شو نداشتی
 
 ته مه پیر گم بیه اقبال بی
 ته ونه خسته تن دوش و بال بی
 
 دل به کو بزوبو برنو ره وردی
 ونه یراق ونه یابو ره وردی
 
 ونه ور مثل ازار اس هاکری
 مثل سیصد تا سوار اس هاکردی
 
 ته قد نشه و خرمن بورده
 ته دست هیمه و رسن بورده
 
 وجین کردی خسته تن داشتی ته دور
 تی لاشی رخت و پیرهن داشتی ته دور
 

 خشک زمین دل او ونستی
 گندم ره تاشیا کسو وندستی
 
 نصف کاری ته روز ره شو هاکرده
 چش چله ریسی گیسو هاکرده
 
 چل تو دایی اون توی بلاره
 جور وفتی نقش روی بلاره
 
 کچال نیشتبی گلیم دور بگردم
 ته ساره دست و دیم دور بگردم
 
 ته ره مرز بیتن و بلو بکوشته
 ته ره تیمجار بچا او بکشته
 
 چه شوایی وشنا بتیم خو بوردی
 دل داغ اتا دونه تیم خو بوردی
 
 اتا دست مه گهره ره تو دایی
 تا دست اون تا وچه ره او دایی
 
 من گر بیته زمین ته نرم وارش
 مه لال بیه تک بشتی نواجش
 
 تا تا تا کردی راه وردی مه ره
 دست ماسی شه همراه وردی مه ره
 
 مه ره گتی شه پسر بلاره
 شه جان دل شه کوتر بلاره
 
 ننا شه وره کاره تو خوندسی
 میچا و تیکا غم ره دونستی
 
 دل نداشتی مه ره ناخش بوینی
 مه ره بی سرین و بالشت بوینی
 
 شه مهربون ننای دور بگردم
 ننه ونه صدای دور بگردم