عاشقی هاکردمه بسان بلبل

عاشقی هاکردمه بسان بلبل

چتی نکنما درد دره مه دل طیبه جان

منه باغبونی نداشته حاصل

چتی ته آرزو ره بورم گل طیبه جان

 

طیبه آملیه بابلیه طیبه جان

طیبه مه یار اولیه

نرگس جار همند سر نزنی

نرگس جار همند سر نزنی

تیر هاکرده کوتری پر نزنی

ته ماه تتی سوئی آرزویی

دل پرچم کر س سر نزنی

 

کندی دره هوا دره

گندم تاش هوا سیو میا ره

 

افتاب سوخنک رنده کنه

سرمست گل لاله خنده کنه

ته سه اشکوفنه اوشمک گل

ته خنده گل متار زنده کنه

 

کندی دره هوا دره

گندم تاش هوا سیو میا ره

 

مسلمانون مه دل هوایی شونه

مسلمانون مه دل هوایی شونه

مه دلبر شو انه صواحی شونه

سفارش هاکردم با گریه زاری

ته قربون بواشم تا گت بواشی  

 

 

امروز چند روزه من بی نازنینم

امروز چند روزه من بی نازنینم

نه در آسمون و نه در زمینم

سپید چادر زنم صحرا نشینم

شب و روز انتظار نازنینم

 

یار بی وفائه

یار پر جفائه

دل مجنون به داغش مبتلائه

های لاره لاره

جان لاره لاره

ته سه بلبل خونده که نوبهاره

 

 

قشنگ مار ته صدای بلاره

قشنگ مار ته صدای بلاره

من شه قشنگ ننای بلاره

ونه گلدار مکنای بلاره

من ته زار و ته بلای بلاره

 

قشنگ مار ته لالای بلاره

ته دست نون و پلای بلاره

اسا فصل بهاره ته بلاره

اسا ته تن نخاره ته بلاره

 

 

پسر ته مامان بنیره

عصا ره دست های م بورم غریبون ماربمیره های مار بمیره

ناله بزنم من داغ شه جوون مار بمیره های مار بمیره

ارزو به دل مار بمیره

ته تن زیر گل مار بمیره

ته دست حنا مار بمیره

پاک نیه حتی مار بمیره

 

ماه اسمون عمه بمیره

کامیاب مهربون عمه بمیره

بی سر بی زبون عمه بمیره

 

نیشتبیمه نال سر بی سر و صدا 

در بزونه در واره بییه وا

باامه چه خبر بیه جان خدا 

بدیمه گننه کامیاب بمرده

 

پسر ته مامان بمیره تنه داغ ره نوینه

 

ای عجل نامرد بیتی مه جوون

و لباس دامادی همه بیه خون

ای خدایا سخت هسته داغ جوون

خدایا صبر هاده کل فامیلا

 

 

مه دل خوانه یکبار بهار بوینم

مه دل خوانه یکبار بهار بوینم آ شکارچی شکارچی تو لث هاده شه خود ره نفس هاده

ککی ره بالای اس دار بوینم آ شکارچی شکارچی تو لث هاده شه خود ره نفس هاده

سپیده بلبل ویشار بوینم آ شکارچی شکارچی تو لث هاده شه خود ره نفس هاده

گمکرده دلبر ره یکبار بوینم آ شکارچی شکارچی تو لث هاده شه خود ره نفس هاده

 

حوصله ندارم اسا دیگر بخونم آ شکارچی شکارچی تو لث هاده شه خود ره نفس هاده

نویمه یاری که وه ور بخونم آ شکارچی شکارچی تو لث هاده شه خود ره نفس هاده

یار بو که خنه نشین بویمه آ شکارچی شکارچی تو لث هاده شه خود ره نفس هاده

انگشتر بیمه بی نگین بویمه آ شکارچی شکارچی تو لث هاده شه خود ره نفس هاده

 

دیگر بهار بیمو من کو نشومه آ شکارچی شکارچی تو لث هاده شه خود ره نفس هاده

دیگر جاده پری او نشومه آ شکارچی شکارچی تو لث هاده شه خود ره نفس هاده

عشر گردن دینه کو نشومه آ شکارچی شکارچی تو لث هاده شه خود ره نفس هاده

ویشکا خنی لمن لو نشومه آ شکارچی شکارچی تو لث هاده شه خود ره نفس هاده

 

دس به تفنگ ته هیاهوی قربون آ شکارچی شکارچی تو لث هاده شه خود ره نفس هاده

ته دست تفنگ برنوی قربون آ شکارچی شکارچی تو لث هاده شه خود ره نفس هاده

سلام مه ره به مه یار برسن آ شکارچی شکارچی تو لث هاده شه خود ره نفس هاده

 

خداوندا مه دل غمگینه امروز

خداوندا مه دل غمگینه امروز

مه تن کوه واری سنگینه امروز

مه ره یاد دکته روز جدایی

مه دست و ته خوجی رنگینه امروز

 

دلبر جان این دنیا وفا ندارنه

دل من طاقت جفا ندارنه

مه چش وارش واری چشم و چشموئه

خیال کنی دنیا خدا ندارنه

 

 

دل هادامه ته ور دئووه امونت

دل هادامه ته ور دئووه امونت، هی ربابه جان ته بلاره

نکن خیانت ای بی مروت، هی ربابه جان ته بلاره

نکنه بشکنی اون عهد و پیمون، هی ربابه جان ته بلاره

ته دامون گیرمه روز قیامت، هی ربابه جان ته بلاره

 

ته چش سرمه

تو نکن برمه

من ته ره ورمه آی ربابه جان ته بلاره

 

بلبل میشکا بخون بموئه بهار، هی ربابه جان ته بلاره

کوهی ره یاد بیمو کوه کوجه بار، هی ربابه جان ته بلاره

کوهی شوننه کوه با لب خنده، هی ربابه جان ته بلاره

نا دارنه کدورت نا غم و غرصه، هی ربابه جان ته بلاره

 

ته چش سرمه

ته نکن برمه

من ته ره ورمه، آی ربابه جان ته بلاره

 

باخت بیمه چی خار خو بدیمه، هی ربابه جان ته بلاره

با عزیز گرم گفتگو دیئمه، هی ربابه جان ته بلاره

چش وا هاکردمه عزیز دنی به، هی ربابه جان ته بلاره

بهشت و دوزخ ره یک شو بدیمه هی ربابه جان ته بلاره

 

ته چش سرمه

تو نکن برمه

من ته ره ورمه ، آی ربابه جان ته بلاره

 

ته وسه لله وا ره پنجه زمبه

ته وسه لله وا ره پنجه زمبه

گسفن ره راه دمبه کوه خنه زمبه

خراب منزل ره په کله زمبه

ته وسه ونگ وا تا محله زمبه